DAT SPEEGELBILD

von Hermann Wilmink
 

In`n Herwst was ett, laat in de Tied,
stockdüster unn de Wegg noch wiet.
Siet eene Wecke Rängenwier,
opp Patt unn Stroaten Dreck unn Schmier.

 

Van`n  „Wilden Mann“ kamm Hinnick Jan,
nich nöchtern mehr, man söögt hem an.
Harr achtern in de Buksentasche,
sien Medizinglass, ne`Braantwienflasche.

 

Unn half in`t goahn, unn half in`t drawen,
flögg hee van een  to`n annnern Grawen.
Obmoal kregg hee dat groat Melör,
dee Schnapsfläsche, dee güng in Schöer.

 

„O lewe Tied! Denn guden Schluck!“
segg Hinnik Jan, „nun iss hee futt“.
Doch watt dat Allerschlimmste was:
sien Achterdeck satt vull van Glas.

 

Dat prökkeln hem unn stöck unn schnitt,
ass wenn doar achtern Imme sitt.
„Mien Achterstell, oh Heer oh Heer,
denn ganzen Ärs, de dött mi sähr“.

 

Nen`Oagenblick stönn Hinnick Jan,
unn denkt, watt dat wall weren kann.
Hee holt de Haand für de Achterbux,
unn jöhlde, wu ne`n kraanken Fucks.

 

Dann knurrde hee:“Ach watt, loat`t susen!“
unn stöck n`Prümken achter de Kusen.
Dat hölp unn gaff hem Moat unn Kraft,
ett gehrt doch nix für Prümkessaft.

 

Dann schlürde hee ass ne lamme Koh,
denn Patt hendal noa Hus hennto.
Wenn bloß sien Wief in`n Schloape lagg!
O leewe Tied, watt gaff dat Krach.

 

Watt `n Glück, ett wass nich soa bedröht,
dee Olsche lagg in`n Berr unn schlöp.
Gott Daank, datt lietste iss auwwerstoahn,
nun sall`t wall eenmoal noch wier goahn.

 

Menn bloß doar achten in de Batzen,
doar föng dat arig an te kratzen.
Hinnik Jan sacht ut de Kökken schlick,
unn in denn Speegel sick bekick.

 

Watt sagg hee ut, dee Ärs heel grelle,
unn hier unn doar n`paar deepe Schnerre.
Watt maak ick blos, ett dött soa säer,
flink an dat Schapp, Heftploaster her.

 

Unn een. twee, dree beklevt hee sick,
in`t Speegelbild dat Achterstück.
Unn dann in`t Berre, ohn Alarm,
Gott Daank, nun lagg hee week unn warm.
Döa emm denn Ärs ock noch wall säer,
hee schnorkte wämmer ass n` Bär.

 

Denn annen Morgen, o watt`n Bedrief,
Dee Olsche blekkt wu`n Düwelswief.
„Du Supschwien, Du, watt hess Du doahn!
Man soll die an denn Schnuten schloan!
Hier kummste her, bekiek Di es,
watt Du für Dummtüg maket hess!“

 

 Hinnik  Jan wass nun richtig tamm,
hee kröpp ut`t Berre forts unn kwamm.
„Hess Du dat Speegel wall all sehn?“         
Hee schüttelt denn Kopp, „Watt sall dann weehn?“

 

Hee harr, nunn wüss sien Frau Bescheed,
dee Ploaster in de Dunigkeet
-well harr soan Tostaand all wall hat –
anstatt fürn Ärs, op`n Speegel klat´t.
                


 

 

     
zurück