Ien miene Kinnertied in de 1950er Joaren wöden de Eärpel met'n Ploog (Schleuderroder) utmaakt.
Bloos de Kaunten en de Riegen up bäide Sieten van dat Stück Laund wöden noch met de Greepe root.
Denn eärsten Eärpelploog, ock wall Eärpelhexe nöömt, is van de Engländer Hanson en Coleman 1852 utfünnen wödden. De Fabrikate, de hier up't Markt wassen, kömmen van de Laundmeschinenfebrik Lanz ut Mannheim. Denn Eärpelploog rood'de de Eärpel met 'ne flakke Schaar, de buten de Milte fastemaakt was en de man höger en läger vestellen kunn, soa dat de Eärpel unner denn Eärpeldamm nett noch packt wöden. Doaroawer was in'n rechten Wijnkel doarto denn Schleuderstern met acht Riegen Tijnken ut Feärenstoal anbracht. Ieder Riege hadd'de veär Tijnken. Denn Schleuderstern drääijde sick liek up denn Eärpeldamm to en schleuderte soa met siene Tijnken de Eärpel en dat Saund in 'ne flacke Loage van round twee bis dree Meter wiet noa de Siete, soa dat de Eärpelgatters de Eärpel licht finnen en upgattern kunnen. Doarmet de Eärpel nich beschaat wöden, was denn Eärpelploog soa inricht', dat de Tijnken van denn Schleuderstern nich sloanend, men keärend up denn Eärpeldamm tröffen. Andrewen wööd denn Schleuderstern bij de öllere Bauriege, de van Peäre trökken wööd, oawer 'ne Wijnkeldrift, de van de Raa ut owerdrögen wööd. Du de eärsten Trekker upkwammen, wööd denn Schleuderstern ock wall döar de Zapfwelle andrewen.
Dat Eärpelgattern achtern Ploog was'n suur Wark. De grooten Buren hadd'n ait heel wat Eärpelgatters nöarig, de äigenen Kinner en Kinner van anner Löö. Meestieden gadderden de Vullwassenen an de Binnenkaunte en de Kinner an de Butenkaunte. Doar muss man heel wat meär häin en weär lopen. Watte Eärpelplöge hadden as Anbaudeel 'nen parallellopenden kegelachtigen Fangkorf de bij an, denn dat Saund 'n lück ofseewde en de Eärpel nich soa wiet flegen lööt.
Ien miene Tied gaff et in 'ne Stounde eene Mark föar't Eärpelgattern. Gatterd wööd snoamiddags van eene tot sesse. Dat heele Stück wööd in Paunde updeelt en meestieden gatterde man met'n tween tegenmekaar döar. Heel wat Akkerwagen wassen dann up't Laund round üm't Stück vedeelt.

Eär' as de Eärpel bij Huus an de Kaunte of in't Eärpelgatt kömmen, mussen se noa de Grött'te utmekaar söcht wodden. Man unnerschäijd'de tüschen Dikken, Potters en Kläinen. Dat döa man heel froger wall van Haund. Men soa üm 1880 köimp ock doarföar Gereetschup up't Markt, wat föar de Buren 'n heel Gemack was. Dat was de Eärpelmölle, at man doartegen up Platt wall sää. Doar wassen meestieden veär flakke Sewe up in de Grött'te van sesstig Zentimeter moal'n good 'n Meter. De gröffste Sewe met sess Zentimeter Maschenwiet'te was boawen föar de dikken Eärpel, doar drunner met veär en half Zentimeter Maschenwiet'te de Sewe föar de Potters en doar drunner dann 'ne Sewe met good dree Zentimeter Maschenwiet'te föar de kläineren Eärpel. En wat doar noch döarföilt was meest Rummel, Saund, Ungemack en de heel kläinen Eärpel.
Achter an de Mölle satt denn Dräijer, met denn man döar dat Rounddräijen de Sewe to't Schütten brachde, nett as bij 'ne Kaffmölle. De Eärpel wöden met 'ne Eärpelgreepe vöarne in denn Trechter gewen en rullden dann döar dat Schütten van de Sewe, de schroat noa achtern höngen, noa achtern, doarüm, dat de Mölle achtern iets läger was. Achter de Sewe föar de dikken Eärpel was noch'n Kläppien, dat man noa de eene of annere Kaunte häindräijen kunn. Man hadde achtern meestieden twee Körwe drunner stoan. Was denn eenen Korf vull, dräijde man dat Kläppien soa, dat de Eärpel noa de annere Siete rullden.
At dat heele Wark schikken sull, kömmen d'r meestieden wall veär bis fief Löö an to passe. Inscheppt wööd met de Eärpelgreepe meestieden van de Wage ut, ock wall van de Grund of van 'nen Böilt. Eene muss dräijen en teminsten twee Löö mussen achtern bij de Körwe ween. Et wöden heel wat Körwe bruukt. Met't Eärpelmöllen güngen d'r meestieden wall veärteen Dage met drup en wij Kinner kömmen as Hölpe doar ock ait bij to passe. En ssoawends wüss man wall, wat man doan hadde. Ock dat Eärpelmöllen wassen 'n suur Wark. Ick mugg dat Eärpelgattern ait noch lewer doon. Dat Lewen was froger nich makkelt up'n Burenhoff. Doar kunn man van noavetellen.

Eärpelploog, denn döar de Raa andrewen wööd.
Foto: Oldtimerclub Niedergrafschaft

Eärpelmölle (van de Siete), Foto: Oldtimerclub Niedergrafschaft

Denn Schriewer
ALBERT RÖTTERINK, Joargang 1944, geboren en upwassen in Ringe, leeft sijnt 1967 in Emmelkamp. He is sint 1983 in'n Vöarstaund van denn Heimatverein van de Groafschup Bäinthem, is sijnt 1984 Vöarsitter van'n Groafschupper Plattproater Kring en sijnt 1995 Vöarsitter van de Heimatfreunde Emmelkamp en ümto, denn he to de Tied met in't Lewen ropen heff.

Wij könnt annemmen, dat latestens sijnt de Bronzetied vöar soan good dreedusend Joar eärste Mäinschen ounse Groafschup besiedelt hebbt. Dat beleggt meärere Steen, de man upgrafft en archäologisch unnersöcht heff, soa as in Emmelkamp, Notthoarn en Uelsen.
To't Dekken van't Dack van't Huus hadd'de man dumoals all rutfünnen, dat man doarföar heel good Reet of Stroa nemmen kunn.
Dat Maken van' soa'n Dack was nich heel makkelt. Dünne rounde Boamstämme deenden as Spoaren, ock as se bettien krumm wassen, Töge en Knüppel kwammen as Latten in Froage. Met Töuw wööd dat Reet of Stroa an de Latten fastemaakt. Denn Fast boawen wööd meestieden met Häideplaggen ofdeckt.
Dat Dekken van't Dack was bis vöar round tach'ntig bis hunnert Joar dat Wark van de Buren sölws. Soa kunn ieder Buur, meestieden unner Methölpe van 'nen Noaber, sien Dack sölws indekken of ock wall weär kloarmaken, at watte Steen kepott wassen.
Later gafft Löö, de sick doar better met utkäinden en de Buren doarbij hölpen. En noch later is doarut dat Ambacht van de Reetdekker entstoan, de sick doar heelmoals up spezialiseert hadd'den bis vandage to.

Dat Reet- of Stroadack kunn up veschillene Wiese maakt wodden. Soa wodd ock vandage noch dat Reet meestieden in geschnürde Bounde anlewert, up de Dacklatten vedeelt en dann soa veschöwen, dat de unneren Reetäinden 'ne schroate döargoande Flackde gaffen. Et kwammen meärere Loagen oawermekaar en wöden met Töuw of Droat fastebünnen. Met denn Klopper wöden de Loagen noa boawen kloppt en in Fassuun bracht. Dit göink nou Loage föar Loage bis an'n Fast wieter. Döar dat Oawerlappen van de eenzelnen Loagen gaff dat 'ne Dick'de van round twintig bis fief'ntwintig Zentimeter. Een Reetdack höilt in de Regel veärtig bis fieftig Joar.

(das Klopfbrett), Foto: Albert Rötterink

Geert Brinkmann (boawen links) en Jan Hilbink (unnern rechts) bij't Dekken van't Dack in Emmelkamp in de 1930er Joaren. Geert Brinkmann heff denn Klopper in de Haunde. Denn Klopper heff sick oawer hunnerte van Joaren nich veannert en wödd ock vandage noch nettsoa bruukt.
Foto: Sammlung Albert Rötterink

Dat frogere Huus Hessels an de Möllenstroate in Emmelkamp in't Joar 1931. Van dat Stroadack wööd froger alle paar Joar 'n Stück nijtmaakt, soa dat et as gelappt utsagg. „'N Stroadack“, sää moal een ault Burenmäinsche, „dat is nett as 'ne aule Buckse, et hang van Stükke anmekaar“. Foto: Sammlung Albert Rötterink

Denn Schriewer
ALBERT RÖTTERINK, Joargang 1944, geboren en upwassen in Ringe, leeft sijnt 1967 in Emmelkamp. He is sijnt 1983 in'n Vöarstaund van denn Heimatverein van de Groafschup Bäinthem, is sint 1984 Vöarsitter van'n Groafschupper Plattproater Kring en sijnt 1995 Vöarsitter van de Heimatfreunde Emmelkamp en ümto, denn he to de Tied met in't Lewen ropen heff.

Föar de Gekke kriegen a`n van Albert Rötterink

Froger en misschien vereenzelnd ock noch wal vandage was of is et Bruuk, up’n 1. April anner Löö in Huus of up’t Wark föar de Gekke to kriegen, dat hett, in’n April to stüren. Woar denn Bruuk as eärste upkummen is, weet gineene meär prezies. Men meent, dat et in Düütschland noa denn 30jöarigen Krieg upkummen is. Soa was et ’nen Spoaß föar de Vullwassenen en föar de, de sick owerlegen föölden. Soa hebbt Vaa of Moar eäre Kinner, de Basen of de Gesellen eäre Leärfäinte of de Leärwichter en de Buren eäre nijs instäilden Knechte of Mägde in denn April stüürt en eär upgewen, dit of dat to halen. Kwammen se dann weär trügge, sä man gauwe „1. April“ of „April, April“.
Bij de Ambachtslöö meent man wal, dat et bij de Timmerlöö begünnen is en sick van doarut ock wal up de anneren Ambachten utbräit heff.

Hier nou ’n paar van disse Grappen:

’Nen Timmermann hadde ’ne masse Möglikhäiten, üm de Leär- of Loopjunge, at man dumoals ock wall sä, up’n Pad te stüren, üm ’ne Sake, de’t garnich gaff, to halen. Denn annern, woar se häinstürt wöden en denn disse Gewoonhäiten wal käinde, spöilde meestieden wal met.

Sao wöden se lössstüürt, üm ’nen Böschungshobel, ’ne Balkenscheäre, de Drempeltrappe, ’nen Gummihamer, dat veärkaunte Gatenboor of de Bogenschnuur to halen.

Bij de Mürkers wann’ et: ’nen Betonhobel, de Bogenschnuur,’nen Sack Stoatfogen of Luchtbellen föar dat Waterpass.

’Nen Anstrieker lööt siene Leärfäinte lopen üm ’ nen Glashamer, ’ nen Glashobel, ’nen Meter Stockfarwe, ’ne Splitterledder of ’nen rounden Glasschnieder to besörgen.

’Nen Göarner stüürde siene Leärjunge löss föar Grieseltiessoat, ’ne Eärdbeärlettertien, Knippmüssiensoat, Kerssenscheärtien of ne Achterutkniipscheäre.

De Smit siene Junge wööd up’n Patt stüürt üm Peäreieserfarwe, ’nen gewichtlosen Vöarhamer, Fielenfett, Ambosschmeäre, Luchthaken, ’n Watermagnet, nich vebräinte Asche of ’nen Emmer Füür- of Brandlucht to halen.

Bij de Mölle kreeg man denn Updrag, up ’nen Mellsack to schriewen of ’nen lögen Mellsack rechtup to setten.

Up de Molkerij lööt man de Leärjunge ’nen halwen Dag sjouwen üm Pappstaumpers, ’nen Emmer vull Daump of ’ne Melkbüsse vull schoane Lucht te halen.

De Bakker was ock ait föar Grappen an’ 1. April to hebben. He stüürde de Leärjunge wal is loss, üm ’n Krintenharkie, ’n Krintengeweär, ’n Krintenscheter of ’n Äierseef to besörgen.

’Nen Stroatenmaker satt heel fake verlegen üm ’n Bogentau föar de Kurven.

’Ne plesäirige Taunte stüürde de Kinner wal is noa’n Winkel föar een Klösssien karriert Goarn of föar Knoapsgate, noa’n Schuster üm een paar linke Schone to halen, en at dee nich doar wassen, mussen se weär trügge, üm een paar rechte Schone mettobrengen.

Ne kloke Leärjunge of ’n helder Kijnd, dat doar all Arge ut hadde, möök dat Spöllchie wal met en bleef dann eenfach ’n paar Üür weg of sää foart „April, April“.

Of men de tegenwoardigen jungen Löö up disse Wiese noch föar de Gekke kriegen kann, glöawe ick nich meär. De Tieden hebbt sick annert, en de jungen Löö bint vandage heel wat driester en upgeklärter as froger en loat’ sick nich soa gauwwe meär föar de Gekke kriegen of wat vöarmaken.

Soa heff denn 1. April, däinke ick, up dat Gebiet utdeent.

Denn Schriewer
Albert Rötterink, Joargang 1944, geboren en upwassen in Ringe, leeft sint 1967 in Emmelkamp. He is sint 1983 in’n Vöarstaund van denn Heimatverein van de Groafschup Bäinthem en is sint 1995 Vöarsitter van de Heimatfreunde Emmelkamp en ümto, denn he to de Tied met in’t Lewen ropen heff.

Aule Geretschuppen up’n Burenhoff

De Kaffmölle van Albert Rötterink

In frogere Joaren wöden up de Buurderij de Roggengarwen met’n Döscheflegel up de Delle döschet. Man doarnoa muss dat Soat of dat Köarn noch van het Kaff trennt wönnen. Dat döa man in heel frogere Joaren doardöar, dat man dat gedöschete Soat, wat noch nich schier was, bettien bij bettien in eene grote platte „Moand“ (Wanne) gooijde. Doarmet günk man dann noa buten in de Wijnd. Man gooijde et een paarmoal üm hoch en doardöar nöimp de Wijnd dann dat Kaff met en dat Köarn föilt weär trügge in de Wanne.
Men noa disse Tied met de Wanne, soa üm 1800, kwamp d’r ’ne Geretschup up’n Markt, dat föar de Buren’ne gewelldige Verbettering was. En disse nije Geretschup was de Kaffmölle. In de Kaffmölle satt ’nen Wäijer met veär of sess grote Blaa, de met ’nen Dräijer an de Butenkaunte verbünden was. En in’n Achterdeel wann’ d’r ’n paar Sewen in.

De Buur kunn nou an denn Drääijer drääijen en döar dat Runddrääijen möken de Blaa ’ne masse Wijnd. Doardöar wäijde dat Kaff ut dat Köarn of Soat, wat de boawen ingooijt wööd.

Eärder met de gewone Wanne kreeg man dat Kaff de wal meest ut, men alle Ssoarten van Ruut, wat de nich inhöarde, bleff de wal in sitten. Vöarall doarüm alleen was disse Kaffmölle ’ne grote Verbettering föar de Buren.

Döar dat men an denn Dräijer drääijde, kwamp d’r nich alleen Wijnd ut, man brachde doarmet ock de paar Sewen an’t Schütten. Man kunn doar ock verschillene Sewen indoon, noa de Dick’de van’t Köarn. Döar dat Schütten van de Sewen bleef dat goode Köarn de boawen up liggen en rullde in ’nen Sack, denn up de eene Siete van de Kaffmölle faste maakt was. En döar dat Schütten sackde dat fiene Soat van dat Ruut döar de Sewen häin en wööd dann in’n Back upfangen, dat unner de Kaffmölle satt. As nou sunn Back gawwe full was, dann hadde man et met’n Buur to doon, de slimme Ground hadde, en dat was nich all to best.

Dat Soat van’t Ruut, wat man soadöanig upföink, vefoarde man an de Honer. Men ock Leefhebbers van Vögel wollen dat Soat wall geärne hebben.

De aule Kaffmölle is all sint Joaren nich meär in Gebruuk en is vandage bloos noch in Museen to bekieken. De Döschemeschinen, de later kwömmen en de Määijdöschers van vandage hebbt de Kaffmölle all lange oflöst. Ick däinke, dat vandage de jungen Buren nich ees meär weet’t, wat ’ne Kaffmölle is en woarföar man se bruukde.

De Kippkoare van Albert Rötterink

Aulewetsche Gereetschuppen

Dat Bijld is upnömmen wönnen an’n 2. Meärt 2014 up het Laundgoot Zwieseborg
bij Gramsbergen in Holland döar Albert Rötterink

Froger hadde man up’n Burenhoff allerläi Warktüüg en Gereetschuppen, de vandage hoast ginneene meär käint. Soa stünd froger hoast up iedern Hoff ’ne Kippkoare. Disse swoare tweeradrige Koare of Wage, met of sunner ’n kläin Rad vöarne, was vöarall hier in de Groafschup Bäinthem, men ock in de Twente en Drente bekäint. De Kippkoare was heel gerieflik en wööd föar allerläi Saken bruukt. At man doarmet Eärpel up of van’t Laund veföarde of noa Huus brachde, kwammen d’r noch Bijplaunken boawen up. Soa kunn man de heel wat meär up loaten. Se wööd meestieden van een Peärd trökken. Wat bij de Kippkoare besünners upföilt, was, dat se ’n lück breeder was as de gewone Akkerwage. En se hadde ock lück breedere Raa, soa dat se in het lösse Laund nich soa gauw wegsakken künn. En de iesernen Hupels üm de Raa sörgden d’r vöar, dat men een mooij breed Spöar hadde. Wal mussen de Buren d’r föar sörgen, dat de Raa fucht blewen, want as se utdröagden, kunnen de haulten Speeken in de Raa löss goan of de Hupels löpen d’r of. Up de Kippkoare wöden döar Dag en Tied veschillene Saken transporteärt. In Harwst of bij’t beginnende Winter wööd dat Back van de Kippkoare up’t Laund fullgooijt met Knollen of Spirrie föar’t Vee en dann met’t Peärd noa’n Hoff bracht. In’t Vöarjoar köimp de Tied van Küinst halen, Potteärpel noa’t Laund brengen ensoawieter. Natüürlik wööd de Kippkoare ock bruukt, at man in’t Sommer noa de Wäide hen melken göink. De Melkbüssen, de Emmers de Sije kwammen achter in’t Back, Peärd d’r vöar, de Buur en de Melkers up’t Sittpläinkien vöarne of soa up’ne Plaunke, soa göink’t hen melken. Hadde man nich soa völl Kone to melken, dann göink’t ock wall met de Melkfietse met twee Büssen d’r vöarne an. Ock geböarde et wall is, dat d’r eene Koo met noa Huus muss. De wööd dann noa’t Melken eenfach achter an de Koare bünnen en kunn soa metloapen noa’n Hoff. Alls met alls was de Kippkoare ’ne Wage, de man froger up de Buurderij nich missen woll. Vöarall de Kaunst, dat man dat Back macklig achterower kippen kunn, was denn gröttsten Vöardeel. Du de Treckers in de 1950er Joaren upkwammen, wööd de Kippkoare de eärste Tied ock noch wall achtern Trekker bruukt. In de 1970er Joaren was’t dann meest geböart met de Kippkoare. Se was nich meär gerieflik genogg. Se köimp in’n Hook te stoan of achter in de Schüre. Soa göink se met Sinn van de Joaren van’t Stoan kepott. Men hier en doar is de eene of annere Kippkoare doch noch in Eären blewen en dat is ock good soa. Soa kann an se vandage dann noch meest in de Heimatmuseen of bij de Trekkerclubs bekieken. Hier en doar sött man se in Holland noch wall is up’ne Kinnerbuurderij stoan met ’ne kläine Trappletter d’r achter föar de Ssegen of Honer to’t Hochklettern soa as up dat Bild bij het Laundgoot Zwieseborg bij Gramsbergen.

Kniepertiesieser van Albert Rötterink
Aulewetsche Gereetschuppen

Kniepertiesieser

Wel käint et nich. Dat Kniepertiesieser in twee heel veschillende Ssorten. De meesten Löö hebbt wall een elektrisch Knieperties- of Joarskokenieser of ’n Waffelieser in Huus. En ock däinke ick, dat heel wat Löö ock noch wal dat aulewetsche Ieser kennt. En dann geff et ja noch dat aule Ieser föar de langen Koken, woar wij ock wal „Schoosollen“ tegen seggt. Dat Kniepertiesieser besteet ut twee lange ieserne Stangen to’t Anpakken en an de Vöarkaunte twee rounde Platen, van binnen met’n Muster, woar de Knieperties tüschen kneppen wödd’t. Waffeln of sükke Kökies bakken geböarde inWesteuropa all vöar meär as dusend Joar. To Beginn geböarde dit döar de Mönche in de Klöster. Disse Kökies wöden dann bruukt as Messbroat in de Karken. Later is man ock buten de Klöster doarto owergoan, up disse Manier kläine Kökies to bakken. Men as se gewoon in Huus backt wöden, satt d’r meestieden Ssucker döar, soa dat denn Smaak lück angenamer was. Dat aule Gebruuk van Knieperties en Joarskoken bakken kenn wij ock in de Groafschup Bäinthem all heel wat Joaren, nettsoa in de Drente en in de Twente van Holland. Men ock in’t Möppensche en Lingsche bint se bekäint. Man kann wall wisse seggen, dat et’n echt ault sacksisch Gebruuk is. In Holland seggt se to de Joarskoken ock wal Rollegies, doardöar dat man se rullt, soa as wij dat hier in de Groafschup ja ock wall kennt. Sükke gerullten Joarskoken hebb ick vöar’n Joar of wat al moal millen in’t Sommer in Luxemburg up’t Markt seen, woar se frisch backt wöden. Weär trügge to de Knieperties en Joarskoken bij ouns. Äinde Dezember, kott vöar Wienachten, dann was’t weär soawiet. Dann muss d’r weär backt wönnen.
Man satt dann froger meest met sick tween üm’t lösse Füür of later ock wall an de Meschine, met’n Emmer vull Deeg, denn maakt was van Maal, Ssucker, Äijer, Botter, Kaneel en Water. Denn eenen maakde ut denn Deeg kläine Bällegies, de denn annern dann tüschen de bäiden Platen van dat Ieser döa, en dat wööd dann in’t lösse Füür of in’t Füür van de Kockmeschine höllen. Man kunn dann seen, dat het Fucht drut vedampde, Botter drüppde d’r ut en lööt dat Füür fake upflammen. As’t utschäide to daumpen, was meestieden denn Momäint kummen, dat dat Kniepertien mooij lecht bruun was. Dann wööd et ut’t Ieser nömmen un muss noch effies platt up de Toafel liggen to’t Ofkülen. As de Kinner d’r ock bijsatten, dann föllen d’r noch wall is extra ’n paar Knieperties kepott, want de düssen se dann upetten. Ock satten se geregelt bij de Bällegies to knippeln, want de wannen ock lekker üm soa to etten. As se froger en nettsoa vandage Joarskoken backden, dann hadde man ’n lück anner Rezept nöarig, doar kwamp dann’n lück meär Ssukker in en denn Deeg was ock heel wat dünner. Denn Deeg döa man dann met’n Leppel in dat Ieser. En as denn Koken kloar was en ut’t Ieser kwamp, muss he heet uprullt wönnen. Froger rullde man de slicht round of as’n Tuthöarn, nett as soanen Kegel. Vandage bruut man fake ’nen Kegel ut Hault doaföar. Watte Löö löden de Joarskoken ock wall platt, dann bruukde man doarföar nich soa völl Platz. Upbewaart wöden de Knieperties en Joarskoken in ’ne Melkbüsse of Trumme, de good dicht was. Doar blewen se dann lange frisch in Heel froger hadde man noch aule Gedachten bij disse Lekkerrijen: An’t Äinde van het Joar kreeg man Knieperties, man dat was’n Kökien, dat heelmoals platt was, nett as dat ofgelopene Joar, dat was ock heelmoals platt en utrullt, all’s was bekäint, et was löss. Later lään watte Huushaulte se ock wall in ’nen Trechter. Dat söög dann mooijer ut. An’n Beginn van’t nije Joar kömmen dann Joarskoken up de Toafel. Want sunnen gerullden Joarskoken symboliseärde dat nije Joar, dat nou nogg heelmoals upgerullt vöar eenen lagg en sick eärst in’t Loop van’t Joar utrullde. Joarskoken wödd’t vandage ock noch wal in heel wat Huushaulte backt. Rezepte föar Knieperties en Joarskoken gaff’t of geff’t ’ne hele Masse. En soa smöken de Koken ock wall bij elk lück anners.

Hier nou’n Rezept föar Knieperties:

• 1 Pund Maal (Mell)
• 400 Gramm witten Bastardssukker
(of 200 Gramm Kristall- en
200 Gramm Bastardssucker)
• 1/2 Pund Botter
• 2 Päkkies Vanillenssukker
• 1 stewigen Teeleppel vull Kaneel
(Zimt)
• 2 lössgekloppde Äijer
en Water
Alls to ’nen Deeg verröaren en kläine
Bällegies doarvan maken.

’n Rezept föar Joarskoken:

• 1 Pund Maal (Mell)
• 1/2 Pund Ssukker
• 1/2 Pund Botter
• 1/2 Pund Kandis
• 3 Päkkies Vanillenssukker
• ’n kläin bettien Sault en’n
kläin bettien Kaneel (Zimt)
en 3/4 Liter Water
Denn Kandis in wöarm Water uplösen
en kault wönnen loaten. Maal (Mell)
en Ssucker unnerröaren. Sault en
Kaneel noa Gesmack d’r togewen.
Denn Deeg ower Nacht stoan loaten.